سعدان بومبارد فيلم و لا اروع

مرحبا بكم اخواني الكرام في موضوع جديد الذي محتواه سيكون مقتبس من الفيلم الثوري الشهير

دورية نحو الشرق للمخرج عمار العسكري ... سوف يتطرق موضوعي هذا الى عدة نقاط وما يحدث في المنتخب الوطني من غليان و قلق من الشارع الرياضي حول مصيره في المونديال بعد هزيمة صربيا وما حدث بعدها من هرج ومرج و شكوك حول مستوى الخضر ولاعبيه وطاقمه الاداري و التقني

اردت الخروج عن الروتين اليومي واعطاء للموضوع هذا صبغة هزلية و لكن به معاني كثيرة

فاليكم النسخة المعدلة من فيلم دورية نحو الشرق بعنوان

دورية نحو جنوب افريقيا .....

مباشرة بعد انتهاء مهمة ام درمان بنجاح على كل الاصعدة من قبل كتيبة الخضر و بقيادة الجينيرال سعدان البومباردي وافترقوا على ترديد مقطوعة : من جبالنا طلع صوت الاحرار ينادينا للاستقلال ...

بعد تلك المشاهد بـ 45 يوما, تلتقي الدورية من جديد في مهمة جديدة فخاطبهم الشيخ سعدان البومباردي ....

يا الخاوة ليوم نتلاقاو من جديد بعدما نفذنا مهمة الخرطوم بنجاح كبير قطعنا عليهم الضو او لهوى غميناهم بر بحر جو فوق الشجر و الاعمدة الكهربائية تحت لحجر بينالهم واش يسوى الجزائري وعلى هذي الشجاعة الجزائر راهي كرمكمتكم و اعطاتلكم وسام الشرف ... وعلى الثقة لي دايرتها فيكم راه اعطاتلكم مهمة جديدة لمواصلة تشريفها .....

آه يا شيخ رانا عيانين بزاف ما ناش لاحقين ....

واش راكم تقولو عيانين واقيل شبعتو الغاريطا فالثكنات دياولكم ... يا الخاوة ما تحشمونيش قدام الجزائر وشعبها راني وعدتهم او مانقدرش نرجع في كلامي ما قعدتش قد ليفات يا جماعة شوية صبر برك

صح يا شيخ واش هي المهمة هذي ؟؟

نحرقوها لسود دافريك او نقطعو الواد او راني نعلمكم المهمة ماشي ساهلة قاع رايحين نقابلو الماريكان ونزيدو نكليز و سلوفيني ..... شكون اجي معايا ؟؟؟

فاحضر الزاوي مجموعة كبيرة من الاسلحة و العتاد ... واش هذا يا الزاوي ؟؟

يا شيخ رايحين نحاربو نكليز و نزيدو الماريكان لازم اكون عندنا احتياطي كبير ....

شكون قالك وقتاش وليت نتا ادبر عليا ارمي عليك الاحتياط .. يا الخاوة جيبو معاكم غير الضروري الطريق طويلة او لازم نكونو واجدين بدنيا ...

يا سي جلول اعطينا آخر المعلومات عن احوال الكتيبة ...

يا شيخ خرجنا بخسائر كبيرة مادية و بشرية بعد معركة انغولا ... كاين 3 مصابين مغني و عنتر و زياني او عندي يا شيخ خبر ما افرحش خفت نقولهولك .... انطق يا جلول ماتخلينيش نهبل واش كاين ؟؟

شاوشي طاح في يد جماعة لافريك راه مكابتيفي عندهم ... واش قلت يا جلول دايما تجيبلي خبارات تاع لغبينة وجعتلي قلبي خلات علينا رانا رايحين بلاطاي لسود دافريك ...

اصبر يا شيخ مازال ماكملتش عندك غزال الزدام راه مشوكي مازال ما قدرش يتعلم اتيري بالسلاح ...

حبس يا جلول الله يسترك بركانا فشلتني ... دير اجتماع طارئ على نصف ساعة نسحق الكل حاضر او ماتنساش تعرض الصحافة بالاك يقدرو افيدونا شوية .... يالله خف واش راك تستنى ما قعدتش وقت يا جدك

بدا الاجتماع بحضور جميع المعنيين ....

يا الخاوة لازم تسمعولي ليا مليح كلام مهم رايح نقولهولكم ... بون عندي عدة خطط او تلفتلي واش نخير بصح لازم تعرفو حاجة وحدة ما تتبدلش الدفاع ثم الدفاع ما تقرصوش عليهم حتى نقولكم ...

غزال الزدام نتا المهمة ديالك تتحرك بزاف نسحقك تعيي العدو تركبلو الخلعة نسحقك تحل الطريق لجبور البولدوزور باش تسهل عليه اطيحهم كي الذبان ... بلحاج الفليشة مهمتك تحكم الناحية اليسرى او يرحم باباك اتحكم في روحك ما تزدمش برك خليهم هوما يقرصو اللولين ...

نطقت الصحافة : يا شيخ راك نسيت شكون لي يحكم الناحية اليمنى ....

ارفد سعدان البومباردي الكابوس او تيرا عليها زوج حبات طيحها فلرض وقال ...

شكون لي عندو سؤال آخر ؟؟ ما كانش ايا مليح هيا يا الجماعة نتلكو على ربي كلشي راه مريقلي ...

---------------

انطلقت الدورية متوجهة الى جنوب افريقيا و بعد مسيرة شهرين من السير المتواصل ... وصلوا الى واد قرب الحدود لزم عليهم اجتيازه ليبلغوا بر امان الدور الثاني ...

----------------

يا الخاوة رانا لحقنا للواد او لازم نشربو منو ما مبقاتش الرجعة ضرك ... يا جماعة ضرك شوية رايحة تجوز على هذا الواد وحدتين عسكرتين امريكية و انكليزية ... ردو بالكم تقرصو عليهم راهم قاويين بزاف وحنا رانا غير كمشة لازم لعقل و الصبر برك نخلوهم هوما اجيو لينا ....

السكات يا الخاوة راهم لحقو ربي يستر برك راني نرعش وحدي ... وشبيك يا شيخ ياك راك موالف نسيت واش درت ف 86 ؟؟

الهضرة ساهلة يا جلول واش جاب 86 لـ 2010 راهي 24 سنة حبيبي او زيد راهي مسؤولية كبيرة 23 بنادم على رقبتي او زيد لعلام فاللعب يا محاينك ...

بينما الكل متخبي مور الشجر و لحجر و الصمت يخيم حتى صرخ عبدون : الله اكبر هذي Grenade في خاطر لي احبونا ...

آه يا عبدون واش درت راك فضحتنا قلتلكم الصبر يا دين الله ... ما تتحركوش يا جماعة ريحو في بلايصكم واقيل ماشافوناش ... يا شيخ راهم حكمونا الناحية اليمنى قعدتنا غير الجهة اليسرى للهجوم واش قلت ؟؟

يا الخاوة il faut sauver le soldat mansouri هذا واش نحتاج ... جيبولي اليتيمة نحتاجها جات اليتيمة واش خصك يا شيخ ... اتصلي فورا بالوحدة المركزية باش الحقونا وحدات الدعم والمساندة

سمحلي يا شيخ عندي ماتيريال قديم بزاف من وقت بومدين ما بدلتوش ما شكيتش نحكم جماعة السونتر

امالا واش جابك هنايا يا دين الله واش راكي اديري معانا ... يا جلول ماشي قلت جيبو معاكم غير لي نحتاجوه شكون جاب اليتيمة ؟؟ صح معليش عيط للصحافة نحتاجها باش تبعث برقية عاجلة للحاج روراوة باش احررنا شاوشي رانا محتاجينو بزاف .... يا شيـ.... انطق يا جلول وشبيك تتعقن علينا ؟؟؟

يا شيخ نسيت بلي راك قتلت الصحافة عندها شهرين ؟؟ يا تزاغات عليا خلات باصيت حاجة ما راهي تمشي نورمال و البلوط ما حبش يحبس علينا و الشارجور خلاصنا باش نقابلوهم ضرك ؟؟؟

صرخ بلحاج لفليشة : سمحلي يا شيخ ما قدرتش نصبر هوما طايحين علينا 1 2 3 ونتا تقولنا احكمو بلايصكم .... انا نزدم او خليها تتخلط قول للحسن اكوفريني

ياو وين رايح بيها احبس ... هبلني هذا لولد دايما هكذا احصلني ... يا شيخ قعدنا غير منصوري مازالو في الخدمة راه اقاوم وحدو ... والباقي وين راهم يا جلول ؟؟

يا شيخ راهم ديجا قطعو الواد ونتا ما جايبش لخبر ياو قعدنا غير انا ونتا او منصوري واش نديرو ضرك ؟؟

اديه واقطع بيه الواد راني نقولك روح ربي معاك حتى تلحقو بصحابكم طلعو لعلام يا لولاد لي ماتو عليه الرجال ....

ونتا يا شيخ واش ادير ؟؟

انا المهمة ديالي تحبس هنا ياك حبيتو تقطعو الواد انا نروح نبومباردي هذيك الكازيرنة و نتوما استغلو الفرصة و اقطعو الحدود او رد بالك يا جلول على منصوري راه عزيز عليا بزاف

نطق جلول : يا شيخ اذا قطعنا هذا الواد يعني المهمة خلاصت ... بصح حبيت نسقسيك واش كاين مور هذا الواد ؟؟؟

واش اداك تسقسي هذا السؤال يا جلول ... ياو هذي تشليلة برك ياو رايحين نتلاقاو بلالمان يا لالمان يا محاينك

الحرب العالمية 3 رايحا تنوض راهم اسالونا حسيفة 82

كنتم مع " سعدان البومباردي "

سلام .....

شكرا اختي ايمان
موضوع شيق حقا

اذن انتطروني في الجزء الثاني

الله يستر برك الحالة راها متعجبش
تقول راها باغي يصرالنا كي مونديال 1986
وقيلة التاريخ يريد أن يعيد نفسه

merciiiiiiiiiii